Ivereno tadidiana ireo rehetra izay nambarany
Tao anaty dimy taona nitondrany firenena,
Dia ho tsapanao daholo fa hay lainga tsisy farany
Izay no hany nisongadina, niampy fandokafan-tena!
‘Ndeha jereo ny tetikasa, inona no mba nitsangana?
Aiza ilay « tanamasoandro » noventesiny an-kabary?
Ny hany tsapan’ny vahoaka : vidim-piainana midangana
Toy ny vary iray kapoaka lasa valonjato ariary!
Iretsy nosy manodidina izay haverina amin’ny gasy,
Hay dia tena rediredy namitahana vahoaka,
Fa ilay filoha nivadika ho vazaha an-taratasy,
Izay no tena zava-nisy nampandoa sy nampihoaka!
Iretsy lalana voalaza fa hamboarina sy harenina,
Aiza izao ankehitriny no tsy misy mbola miainga?
Mandiniha sy mihevera, saino tsara izay tenenina,
Hay tsy anarana entim-poana ilay anao ry Rainilainga!
Ny orinasam-panjakana, miharitra ny mahamay
Fa tena mitsipozipozy sy eo an-dalam-pialana aina,
Izao no mbola hotohizana amin’ny dimy taona indray?
Sanatria dia sanatria, meteza isika ho tonga saina!
TSIMIMALO (07-09-23)
